Student’s rights, welfare code padayong gipanday

TUKION sa umaabot tigom sa komite sa Sports and Youth Development ni Konsehal John Michael Seno ug komite sa Edukasyon ni konsehal Suzette Magtajas-Daba ang sugyot ordinansa nga maghan-ay sa mga katungod ug kaayohan sa mga tinun-an o’ Student Rights and Welfare (STRAW) Code.

Kini human ang Technical Working Group (TWG) nga gimugna pagpanday sa maong balaodnon mihangyo sa dugang panahon aron makonsolidar ang tanang rekomendasyon, panahom ug opinyon sa mga ahensya sa gobyerno ingon man mga suhestyon gikan sa kadagkoan sa mga tunghaan aron malakip sa maong sugyot ordinansa.

Mahinumduman nga sa milabayng tigom sa duha ka komite, pipila sa mga mitambong gikan sa kadagkoan sa mga tunghaan ug mga opisyal sa Parents Teachers Association (PTA) ang nagpadayag sa kamahinungdanon sa maong balaodnon.

Nunot niini, malaumon sila si Konsehal Suzette ug Seno nga mapahigayon ang tigom sa madaling panahon aron mapadayon ang pagpanday ug pagtuon sa sugyot ordinansa.