SP nag-aprobar sa 2025 budget sa SK Brgy. 39

ATOL sa ika-114 nga regular sesyon nga gidumala ni Presiding Officer Pro Tempore Konsehal Romeo Calizo, mayoriyang giuyonan sa konseho ang resolusyon alang sa 2025 Annual Budget sa Sangguniang Kabataan (SK) sa Barangay 39 nga adunay gibanabanang kinitaan ug galastohon nga mokabat sa ₱600,945.00.  

Ubos sa maong budget, gigahin sa maong SK council ang ₱193,072.00   alang sa mga programa nga mosuporta sa kalambuan sa kabatan-onan sa aspeto sa panglawas, edukasyon, kalinaw ug seguridad, maayong pamalaod, aktibong partisipasyon sa komunidad, ug pagpanalipod sa kalikupan.

Sa laing bahin, gialokar usab ang ₱90,612.00 para sa honoraria sa mga opisyales ug miyembro sa konseho, samtang ₱317,261.00 ang gitakda para sa Maintenance and Other Operating Expenses (MOOE). Kini naglakip sa gasto alang sa biyahe, suplay sa opisina, uniporme, pagmintinar sa mga ekipo, suplay sa kuryente, bayad sa SK Federation dues, ug uban pang kinahanglanon sa pagpadagan sa buhatan.

Ang maong pondo gikuha gikan sa 10% sa kinatibuk-ang budget sa barangay, subay sa mandato sa Republic Act 10742 o Sangguniang Kabataan Reform Act of 2015. 

Ang pag-aprubar sa maong mga budget gipaluyohan sa komite sa sports and youth development nga gipangulohan ni Konsehal Kenneth John Sacala, ug sa komite sa pamalaod ug reglamento nga gipangulohan ni Konsehal Edgar Cabanlas. (SPEscoltos/SP)