Solid waste ordinance sa Dansolihon gioyunan sa Konseho

MAHAN-AY na ang paglabay sa mga basura ug mabatunan ang hingpit nga kalimyo sa Barangay Dansolihon.

Kini  human ang Konseho sa sesyon niadtong Lunes nga gidumala ni Bise Mayor Bebot Rodriguez misagop og resolusyon nga nag-uli sa ordinansa sa Barangay Dansolihon nga may kalabutan sa pagpatuman sa solid waste management sa ilang barangay ug nagpahamtang og multa sa mga makalapas niini.

Sumala sa barangay nga ang dili sistematiko nga paglabay sa mga basura sa kabalayan, commercial ug industrial establishments ug ubang organizational institutions miresulta sa kahugaw sa palibot  ug maoy kasagarang hinungdan sa mga sakit.

Gipasabot nga ang hustong pag-segregate sa basura diha palang daan sa mga panimalay  dili lang makagamay sa gasto sa koleksyon ug sa paglabay niini apan maka-konserbar usab sa natural resources.

Ang resolusyon nga gipalabang sa konseho alang sa maong katuyuan gipaluyohan sa Komite sa Barangay Affairs ni Konsehal Yan Lam Lim ug Komite sa Pamalaod ug Reglamento ubos ni Konsehal  Edgar Cabanlas.