Socialized Housing Program Ordinance gi-amendar sa Konseho

MALUGWAYAN pa og lima ka tuig ang pagbayad sa amortization sa luna sa mga homeowners diha sa Barangay Consolacion.

Kini human hiniusang giuyonan sa konseho sa syudad, atol sa sesyon nga gidumala ni Bise Mayor Bebot Rodriguez, ang pag-amendar sa Ordinance No. 14248-2022 nga nagmando sa pagkanselar sa mga yutang na-award ngadto sa mga benepisyaryo sa socialized housing program sa syudad kon sila mapakyas pagbayad sa amortization sulod sa usa ka tuig.

Nasayran nga daghang benepisyaryo sa maong programa ang dili maka-afford pagbayad sa mubo lamang nga panahon.

Subay niini, mihangyo sa Komite sa Urban Poor ni Konsehal Edgar S. Cabanlas si Kag. Robert A. Bolong, presidente sa ISLACUPA Homeowners Association, alang sa pagduso sa maong lakang aron mabayran ang acquisition cost sa ilang unit pamaagi sa installment basis sulod sa lima ka tuig.

Ang gipalabang nga ordinansa sa konseho gipaluyohan sa Komite sa Urban and Rural Poor and Housing Development ug sa Komite sa Pamalaod og Reglamento ni Konsehal Cabanlas.