Social protection program mapalapdan

GILANTAW nga mapalapdan pa ang programang magproteher sa katilingban dinhi sa dakbayan. Ang Komite sa Social Services ubos ni Konsehal Girlie Balaba gipaabot nga mopalabang og balaodnon nga mag-umol sa komprehensibong social protection program sa lokal nga kagamhanan.

Kini nunot sa gipakanaug nga Joint Memorandum Circular (JMC) No. 2022-001 sa Department of Social Welfare and Development (DSWD) ug Department of the Interior and Local Government (DILG) nga naghan-ay sa mga giya agig suporta sa pagpatuman sa Pantawid Pamilyang Pilipino Program (4Ps).

Nasayran nga ang pagpalabang sa nahisgotang balaodnon maoy usa sa mga talamdan nga napatuman sa hingpit ang social protection services ug magpadayag nga adunay kaakuhan ang lokal nga kagamhanan dinha sa padayong pag-abag sa mga pamilyang migradwar na sa programa.

Niini, ang sugyot balaodnon maghan-ay sa gikinahanglang support package ngadto sa mga pamilya ug gipaabot nga magdala sa dugang kaarangan sa kinabuhi sa katawhan.