Social pension sa PWDs makaabag alang sa hayag nga ugma – Moreno

GAMAY lang kaayo ang tag-P500 nga social pension apan usa na kini ka paagi nga maabagan ug mahatagan sa mas maayong kaugmaon ang mga Kagay-anong adunay kabilinggan sa panglawas. Mao kini ang gibutyag ni Konsehal Imee Moreno atol sa milabayng tigom sa komite sa social services ni Konsehal Girlie Balaba human gituki ang sugyot ordinansa nga magtunol og social pension sa mga kabus ug kabataang adunay kabilinggan sa panglawas. Matod sa konsehal nga isip usa ka inahan ug iyaan sa PWD, dili tiaw ang iyang kasinatian sa pag-atiman sa iyang anak gawas pa nga dili tanan makagahum sa pagpatambal o’ pagsulod sa mga PWD sa rehabilitation facility. Unsa man ang panabang ug suporta nga atong matunol mahimong nang tulay aron ang matag PWD mahatagan sa inspirasyon nga manlimbasog alang sa hayag nga ugma, panapos ni Konsehal Imee Moreno. Ang tigom sa komite gitambongan usab nila ni Konsehal Yvy Emano, Aga Sua ug Bernie Esparcia.