Small town lottery gipahimangnuan

SI konsehal Roger Abaday, chairman sa komite sa games and amusement, mipahimangno sa tigdumala sa DMC Small Town Lottery nga ipatuman sa hingpit sa ilang mga sub-agents ang balaod ug palisiya nga nagdili sa mga menor de edad nga makataya dinha sa ilang nagkadaiyang outlets dinhi sa syudad.

Kini human miabot sa komite ang reklamo kalabot sa maong isyu ug ang giingong managlahing mogawas nga resulta sa STL sa Cagayan de Oro, Misamis Oriental ug Bukidnon. Atol sa tigom sa komite niadtong Martes, gitubag ug gitataw ni PCSO Manager Divina Salvacion nga isa lang ang mogawas nga resulta sa STL Mindanao nga bolahon matag alas 10:30 sa buntag, alas 3 sa hapon ug alas 8 sa gabii.

Dugang pa, giingon nga walay pakyas ang ilang buhatan dinha sa mandong pagbutang og pahibalo nga gidid-an ang mga menor de edad sa pagtaya.

Niini si Abaday mihangyo sa tigdumala sa DMC small town lottery nga dugangan ang ilang mga trabahante nga nga magmatikod dinha sa ilang mga STL outlets aron masiguro nga napatuman ang mga gabayan ug palisiya sa PCSO.