SK sa Brgy 35 mopatuman og dugang mga programa

Gilantaw nga mapatuman ang dugang mga programa ug proyekto sa kabatan-onan sa Barangay No. 35.

Kini human ang konseho sa syudad sa sesyon niadtong Lunes nga gidumala ni Bise Mayor Jocelyn Rodriguez misagop sa resolusyon nga nag-uli sa resolosyon sa Barangay 35 diin nasukip ang Supplemental Budget No. 1 (SB1) sa Sangguniang Kabataan (SK) nga adunay gibanabanang kinitaan ug galastohan balor P485,241.00.

Lakip sa gihatagan og prayoridad nga mapatuman mao ang programa sa edukasyon ilabina dinha sa pagpakatap sa dugang kahibalo kabahin sa panglawas, active citizenship, pagproteher sa kinaiyahan ug uban pang mga programa nga gitumbok aron sa pag-aghat sa kabatan-onan nga makiglambigit sa mga kalihokan sa kapunungan.

Ang resolusyon nga gipasaka sa konseho alang sa maong katuyuan gipaluyuhan sa komite sa sports and youth development ni Konsehal John Michael Seno ug komite sa pamalaod ni Konsehal Ian Mark Nacaya.