SK budget sa brgy 28, giaprobahan sa konseho

PINAAGI sa resolusyon nga gipalabang sa konseho sa dakbayan ubos ni Bise Mayor Bebot Rodriguez, mapatuman na sa Sangguniang Kabataan (SK) sa Barangay 28 ang ilang mga programa ug proyekto, nga adunay gibanabanang kinitaan ug galastohon nga nagkantidad og ₱369,957.00 alang sa tuig 2024.

Lakip sa gihatagan sa prioridad sa ilang budget ang mga inisyatibo alang sa kaayuhan ug pag-empower sa kabatan-onan, diin ₱131,970.00 ang gigahin alang sa mga proyekto  sa panglawas pinaagi sa feeding program, edukasyon, ug capability building and leadership training. Apil niini ang Barangay 28 Sports and Cultural Activity, Linggo ng Kabataan, Barangay 28 Got Talent, ug Katipunan ng Kabataan (KK) Assembly.

Gipundohan usab ang personal services nga nagkantidad og ₱92,448.00 alang sa SK honorarium, samtang ₱145,539.00 ang alang sa maintenance ug operating expenses, nga naglakip sa gasto sa biyahe, training, mga gamit sa opisina, uniform, fidelity bond premium, ug mga membership dues ug kontribusyon sa mga organisasyon.

Ang maong pondo gikuha gikan sa napulo ka porsyento (10%) sa kinatibuk-ang budget sa barangay, subay sa mandato sa RA 10742 o Sangguniang Kabataan Reform Act of 2015.

Ang resolusyon nga nag-aprobar sa maong budget gipaluyohan sa Komite sa Sports and Youth Development ni Konsehal Kenneth John Sacala ug sa Komite sa Pamalaod ug Reglamento ni Konsehal Edgar Cabanlas