SK budget sa Brgy. 12 giuyunan sa konseho

Atol sa ika-98 nga regular sesyon nga gidumala ni Bise Mayor Bebot Rodriguez niadtong Lunes, gipasa sa konseho sa dakbayan ang usa ka resolusyon nga nag aproba sa 2024 annual budget sa Sangguniang Kabataan sa Barangay 12 ning siyudad nga mokabat og ₱351,850.00.

Ang maong budget nakuha gikan sa napulo ka porsyento (10%) sa kinatibuk-ang pondo sa barangay, subay sa Republic Act 10742 o ang Sangguniang Kabataan Reform Act of 2015.

Gitagaan ug prayoridad sa maong SK ang mga programa alang sa pag-uswag ug pag-empower sa kabatan-onan, diin ₱209,850.00 ang gi-apod-apod sa mga proyekto nga nagtumong sa pagpalambo sa kabatan-onan sa mga aspeto sa kahimsog, edukasyon, social inclusion ug equity, pagpatunhay sa kalinaw ug seguridad, maayong pang-gobyerno, aktibong pagkamamayan, ug proteksyon sa kinaiyahan.

Sa laing bahin, gialokar usab ang ₱87,912.00 alang sa honoraria ug ₱54,088.00 para sa Maintenance and Other Operating Expenses (MOOE).

Ang resolusyon nga gisagop sa konseho alang sa maong katuyuan gipaluyuhan sa Komite sa Sports and Youth Development ni Konsehal Kenneth John Sacala ug Komite sa Pamalaod ni Konsehal Edgar Cabanlas.