SK annual budget sa Brgy. 39 giuyunan sa konseho

MAPATUMAN na sa mga opisyal sa Sangguniang Kabataan sa Barangay 39 ang ilang mga programa ug proyekto.

Kini human ang konseho sa dakbayan sa sesyon niadtong Lunes nga gidumala ni Bise Mayor Bebot Rodriguez mipasa sa resolusyon nga nag-aproba sa ilang annual budget para sa 2024. Ang maong budget naglangkob sa kinitaan ug galastohon balor ₱328,407.00.

Lakip sa gihatagan og prayoridad sa maong SK ang maintenance ug operating expenses, lakip na ang mga gamit sa opisina ug  mga gasto sa pag-ayo ug pagmentinar sa ilang buhatan. Ang budget usab gigahin alang sa mga programa sa kabatan-onan nga naglakip sa panglawas, peacebuilding ug security, edukasyon, active citizenship, pagdumala, ug environmental protection.

Ang maong resolusyon nga gisagop sa konseho alang sa maong katuyuan gipaluyuhan sa Komite sa Sports & Youth Development ni Konsehal Kenneth John Sacala ug Komite sa Pamalaod ni Konsehal Edgar Cabanlas.