SK Annual Budget sa 2 brgys giuyonan sa konseho

MAPATUMAN na sa hingpit sa Sangguniang Kabataan sa duha ka mga barangay ang ilang mga programa ug proyekto alang karong tuiga.

Kini human ang Konseho sa syudad ubos ni Bise Mayor Bebot Rodriguez, sa sesyon niadtong Lunes, misagop sa resolusyon nga nag-uli sa tagsa-tagsa ka resolusyon sa barangay Dansolihon ug Patag diin nasukip ang 2022 SK Annual Budget.

Sa Dansolihon, adunay gibanabanang kinitaan ug galastohon balor P965,500.00 samtang sa Patag mobalor sa P2,267,323.00 ang gitagang annual budget.

Gihatagan sa prioridad sa duha ka barangay nga mapatuman karong tuiga ang programa paghatag og dugang kahibalo sa natad sa panglawas sa kabatan-onan, kampanya kontra druga, pagproteher sa kinaiyahan ug mga programa nga mag-umol sa capability building ug leadership sa kabatan-onan.

Dugang niini, ang Dansolihon migahin usab og igong pundo alang sa paugnat sa kusog aron maaghat ang mga kabatan-onan nga makiglambigit sa mga kalihokan samtang ang Patag migahin og igong pundo alang pagpangandam sa kalamidad sa barangay.

Ang resolusyon nga gisagop sa konseho alang sa maong katuyuan gipaluyohan sa komite sa sports and youth development ni Konsehal John Michael Seno ug komite sa pamalaod ni Konsehal Ian Mark Nacaya. (SP/RNQuiblat)