Sitwasyon sa Macahambus Cave tun-an ni Pascual
- spwebsiteblog
- Mar 19
- 1 min read
ANG kanang (Macahambus) cave is closed pa gyud na sa public, so bawal pa gyud unta ang pagsulod. But sige ga gision ang “Do Not Enter” nga signage.
Kini ang gibutyag ni Konsehal Jay Pascual, chairman sa komite sa turismo, agig reaksyon sa taho ni Konsehal Bernie Esparcia atol sa sesyon niadtong Lunes nga gidumala ni Bise Mayor Bebot Rodriguez kabahin sa kasamtangang sitwasyon sa Macahambus Cave.
Gipasabot sa konsehal nga gabutangan permi og barikada ang maong langub sa City Tourism Office apan sige pud gubaon kay dili man mabantayan 24/7.
Matod sa konsehal nga tsada kung makaabot kana sa pinakatumoy sa Macahambus Cave kay nagdungaw kini sa suba ug pangpang ang dapit, apan adunay gipangtaya na nga mga istraktura nga hadlok na kaayo maguba ug mahugno.
Kini ang rason nga temporaryong gidid-an sa gyud ang mga tawo sa pagsulod diha sa maong langob kay kung naa unyay mahulog ug mamatay, segurado man gyud ang gobyernong lokal ang manubag ug mabasol, sumpay ni Pascual.
Niini, si Konsehal Pascual misugyot nga maindorsar sa iyang komite sa turismo ang maong taho aron usab mahisgotan ang gigahing pundo sa miaging tuig alang sa pagpaayo ug gilaomang mapadali sa buhatan sa City Tourism Office ang pag-implementar niini karong tuiga. (RNQuiblat/SP/Photos by JRGalano and Metro Cagayan de Oro website)
댓글