Sister ties on road safety tali sa CDO, Zamboanga City pirmahan

PABORABLENG gidawat sa Konseho sa Syudad ubos ni Bise Mayor Bebot Rodriguez ang tanyag sa dakbayan sa Zamboanga nga mamugna ang panag-inigsoonay tali sa Cagayan de Oro. Kini human gipasaka sa konseho, sa sesyon niadtong Lunes, ang resolusyon alang sa maong katuyuan.

Ang maong resolusyon naghatag usab sa katungod ni Mayor Klarex Uy pagpirma sa Memorandum of Understanding (MOU) nga naglangkob sa pagmugna sa Sisterhood Agreement kalabot sa kapaseguroan dinha sa kadalanan ug uban pang programa ug pagpalambo sa panagbayluay ug kooperasyon sa tananng matang sa lain-laing ang-ang sa lokal nga panggobyerno.

Tumong niini nga makuha ang panagtambayayong aron mamugna ang mga stratehiya, teknolohiya, datus ug ubang impormasyon kalabot sa mga insidente, pagka-angol, pagkamatay ug pagpatuman sa mga angayang lakang aron mahimong luwas ang tanan dinha sa kadalanan.

Sa tuig 2018, giila sa World Health Organization (WHO) nga ang insidente sa kadalanan mao ang nag-unang hinungdan sa pagkamatay sa mga nag-edad og singko anyos ngadto sa 29 anyos.

Nasayran usab gikan sa datus sa Philippine Statistics Authority (PSA) nga adunay pagsaka sa mga insidente nga naglambigit sa kabatan-onan o’ mga batang gikan sa tunghaan nga molungtad sa pagkamatay dala sa kakulangon sa mga lakang nga maghatag sa luwas nga pag-agi sa kadalanan.

Ang resolusyon gipaluyuhan sa Komite sa Sister City Relation ni Konsehal Suzette Magtajas-Daba ug Komite sa Pamalaod ni Konsehal Edgar Cabanlas.