Silk project sa brgy Pagalungan mapundohan

HAYAN mahatagan na sa katumanan ang gihangyong proyekto sa mga mag-uuma sa barangay Pagalungan.

Gipaabot konsiderahon sa konseho sa syudad ubos ni Bise Mayor Kikang Uy ang gisugyot nga Memorandum of Understanding (MoU) tali sa Department of Science and Technology -10, DOST- Misamis Oriental, DOST- Philippine Textile Research Institute (PTRI) ug lokal nga kagamhanan sa dakbayan sa Cagayan de Oro.

Kini naglangkob sa pagpatuman sa programang “USEforSilk: Utilization of Sericulture Farming in Sitio Buracan, brgy. Pagalungan, CDOC-D1 in support of Mindanao Silk Development”.

Niini, ang DOST mogahin og kapin sa P242 mil alang sa programa nga molungtad sulod sa usa ka tuig samtang ang DOST-PTRI maoy maghitsas sa mga mag-uuma sa gikinahanglang kahibalo sa pagbuhi sa silkworm ingon man sa produksyon sa tela nga silk.

Si Bise Mayor Uy malaumon nga makatabang sa katawhan sa dakbayan ang programa aron mahatagan sa kaarangan ang ilang mga kinabuhi.