Serbisyo sa natad sa panglawas mapalapdan

HAYAN mapalapdan pa ang serbisyong gitunol sa kagamhanan sa dakbayan ngadto sa katawhan sa natad sa panglawas.

Kini human girekomendar ni Mayor Klarex Uy ngadto sa Konseho sa Syudad ubos ni Bise Mayor Bebot Rodriguez nga mapundohan ang pagtukod sa tertiary laboratory extension dinha sa City Health Office.

Ang proyekto nga mobalor og P5.8 milyones usa sa mga proyektong nasukip sa paga-aprobahan sa konseho nga Supplemental Budget No. 5 sa General Fund sa dakbayan sa sesyon karong adlawa. Dugang niini, gipundohan usab og P1.2 milyones ang pagpalit og dugang office ug laboratory equipment.

Ang SB5 nga gipaabot aprobahan sa konseho mobalor og P510 milyones kapin alang sa 2023 General Fund ug P70.34 milyones kapin alang sa SB2 sa 2023 Special Account: Local Economic Enterprises/Utilities.