Serbisyo sa Brgy 35 mapalapdan

Dugang serbisyo ug mga programa ang gipaabot nga ipatuman sa Barangay No. 35 ngadto sa ilang ginsakopan sa nahabiling bulan, ning tuig 2022.

Kini human ang konseho sa syudad sa sesyon niadtong Lunes nga gidumala ni Bise Mayor Jocelyn Rodriguez misagop sa resolusyon nga nag-uli sa ordinansa sa barangay diin nasukip ang ilang Supplemental Budget No.1 nga adunay gibanabanang kinitaan ug galastohon balor P1,295,010.00.

Tipik sa gigahinan sa maong budget ang pagpalit og mga ekipo, pagtukod sa proyektong imprastraktura ug galastohon sa ilang operasyon alang sa dugang serbisyo sa ilang katawhan.

Ang resolusyon nga gipalabang sa konseho alang sa maong katuyuan gipaluyuhan sa komite sa barangay affairs ni Konsehal Yan Lam S. Lim ug komite sa pamalaod ni Konsehal Ian Mark Nacaya.