Seno padayong nagtuon sa sugyot Infra Mgmt Board

Padayong girepaso sa komite sa public works ni Konsehal John Michael Seno ang sugyot ordinansa nga magmugna sa Engineering and Infrastructure Management Board (EIMB) ug ang komposisyon nga naglangkob niini.

Tumong sa maong sugyot nga mahan-ay ang pagpatuman sa mga proyekto sa nasyonal ug lokal nga kagamhanan aron malikayan ang mga insidente sa pagbaha, kahuot nga dagan sa trapiko ug bisan mga aksidente sa kaladanan sa tinguha nga dili masayang ang pundo nga gigamit sa pagpatuman sa proyekto.

Sa milabayng tigom sa komite, si Seno mipasabot nga tumong sa sugyot balaodnon nga mahan-ay ug masiguro nga aduna gayud igong koordinasyon tali sa mga ahensya sa nasyonal nga kagamhanan ug lokal nga kagamhanan lakip na ang mga pribadong entities aron ang mapadali ang pagpatuman sa proyekto og malikayan nga mahunong ang pagtrabaho panahon nga adunay mga ahensya nga wala pa mabalhin ang ilang mga tubo ug uban pang kagamitan.

Hinoon, suportado ug positibo ang tubag ug reaksyon sa mga dinapit nga personahe sa lain laing ahensya sa gobyerno ug gitakdang ipadayon ang pagtuki niini sa sunod nga tigom sa komite.

Ang tigom sa komite gitambongan usab nila ni Konsehal Roger Abaday, Yan Lam S. Lim, Yvy Emano, Aga Suan ug Bernie Esparcia.