Seno pabor pagtukod sa CDO Greenbelt

“ANG pagmugna og elevated pathways o walkways aron magkonektar sa mga nagkadaiyang malls dinhi sa syudad makaengganyo sa pagbaklay ug makatabang sa kahimsog sa panglawas sa tawo.”

Mao kini ang gibutyag ni Konsehal John Michael Seno, Chairman sa Komite sa Public Works atol sa programang “Ang Inyong Konseho Karon” diin gihisgutan ang sugyot pag-establisar og Cagayan de Oro Greenbelt.

Gibutyag ni Seno ang iyang kasinatian didto sa kaulohan nga imbes nga magsakay paingon sa laing mall, magbaklay na dinha sa elevated pathways pagtabok ug mas dali ang pag-abot sa paga-adtoan.

Niini, hugot niyang gisuportahan ang sugyot pagtukod og elevated walkways dinhi sa syudad sa punto nga makatabang kini nga makunhuran ang kapiot nga dagan sa trapiko ug labaw sa tanan makaaghat sa mga tawo nga magbaklay ug maka-ehersisyo.

Siya midugang nga mag-parking na lang sa usa ka lugar ug makatabok-tabok na sa nakakonektar nga walkways sa nagkadaiyang malls dinhi sa syudad.