Seno naninguha maaksyonan sa DWPH hangyo sa RTMI

PABOR ang komite sa public works ni Konsehal John Michael Seno sa hangyo sa Rural Transit Mindanao Inc. (RTMI) ngadto sa Department of Public Works and Highways (DPWH-10) nga mapalapdan ang gintang sa median island nga nahimutang tungod sa ilang buhatan diha sa Kauswagan Highway.

Sa tigom sa komite niadtong Mierkoles nga gidumala ni Seno, si RTMI Branch Manager Jessie Boy Lentorio mihangyo nga malugwayan ang kasamtangang dos metros nga gintang sa maong island ngadto sa siete metros aron makaaagi ang ilang mga bus panahon nga adunay pagbaha.

Gipasabot ni Lentorio nga panahon sa baha, gawas nga galisod ang ilang mga bus paglatas sa baha gikan sa ilang shop taas taas usab ang tuyukan niini hinungdan nga malangan ang pag-abot ngadto sa Westbound Terminal nga makaaberya usab sa byahe sa mga pasahero.

Si Seno mipasabot nga angayang hatagan sa igong pagtagad sa DPWH ang maong hangyo aron dili madelatar ang mga pasahero ug gani, siya misugyot nga mahimo nga siraduan kun walay ulan ug butangan sa portable barricade.

Sa iyang bahin, si Engr. Nonito Oclarit sa Roads and Traffic Administration (RTA) mibutyag nga uyon siya sa hangyo sa kompanya tungod kay iyang namatikdan nga pag mogawas ang bus sa RTMI kinahanglan nga adunay personahe nga magtabang dinha sa trapiko sa highway ug kun didto kini sa unahan pa motuyok wala nay personahe nga gatabang hinungdan nga galisod sila ug pelegro pa sa disgrasya.

Niini, ang representante sa DPWH-10 mipasalig nga ipaabot sa director ang hangyo aron mahisgutan ug maaksyonan sa ilang buhatan.