Seno nangusog matibawas drainage project dihas Bugo

Gusto kong matibawas na ang proyekto sa labing daling panahon. Kini ang hugtanong pamahayag ni Konsehal John Michael Seno atol sa tigom sa Komite sa Public Works sa milabayng semana human gituki ang hinungdan sa kalangan sa pagtibawas sa proyekto nga gipatuman sa Department of Public Works and Highways (DPWH-10) diha sa national highway sa Barangay Bugo.

Sa tigom sa komite, ang representante sa District 2 Engineering Office sa DPWH mibutyag nga kun dili ma-demolish ang mga straktura nga natukod sa dapit ug nakababag sa proyekto magpadayon gihapon ang pagbaha tungod kay dili man masumpay ang drainage. Mao kini ang mahimong hinungdan nga masinati gahipon ang pagbaha sa dapit, dugang sa taga-DPWH.

Niini, si Seno miawhag sa mga opisyal sa barangay Bugo nga ipatuman ang Memorandum sa Department of Interior and Local Government (DILG) nga limpyohan ang mga sidewalks ug road right of way sa mga nagbabag nga mga straktura.

Nasayran usab gikan sa buhatan sa Building Official (OBO) nga ang gitumbok nga mga straktura natukod nga walay panugot gikan sa dakbayan gawas pa nga wala usab kiniy business permits butang nga gikadismaya ni Seno.

Ikaduha na kining higayon nga gidapit ang kapitan sa Bugo aron madungog ang iyang panahom bahin sa maong problema apan wala gayud magpakabana nga unta importante kaayo ang hisgutanan.

Niini, gidapit ni Seno sa ikatulong higayon ang kapitan sa barangay Bugo pagtambong sa sunod tigom aron madungog ang iyang panahum ug opinyon kalabot sa lakang pag-demolish sa mga straktura dinha sa national highway.