Seno nangusog masunod mga balaod sa syudad

"Palihog respitoha ang mga ordinansa sa syudad."

Kini ang gipasidaan ni Konsehal John Michael Seno, atol sa milabayng tigom sa komite sa public works, human gituki ang sulat ni City Engr. Jenito Asequia kalabot sa nagpadayong pagkalot diha sa Barangay Indahag; Macapaya, Camaman-an; Mambuaya ug Baikingon nga giingong walay excavation permit.

Sa maong tigom, gitumbok sa representante sa CEO ang Mindanao Cooperative Water Services (MCWS) nga matod pa padayong nagtrabaho sa ilang proyekto taliwala nga walay excavation permit nga giluwatan ang kagamhanan sa dakbayan.

Gipasabot ni Seno nga kinahanglang sundon gayud ang ordinansa sa syudad ilabina kun negosyo ang hisgutan ug dili mahimo nga sugdan ang trabaho nga wala pay panugot tungod kay kalapasan kini sa balaod.

Hinoon, ang kooperatiba mibutyag nga padayon nang giproseso ang permit ug mipasalig nga ilang sundon ang ordinansa sa syudad.

Niini, nanghinaut si Seno nga dili na kini mausab ang pagbaliwala sa balaod sa syudad aron malikayan ang pagpahamtang sa multa ug legal nga mapatuman ang proyekto.