Seno nangusog mapatuman sa hingpit Oro Adolescent Health Program

GIKINAHANGLAN ang kolaborasyon sa mga hintundang buhatan sa kagamhanan ug mga ahensya sa gobyerno dinha sa pagtunol og serbisyo ngadto sa kabatan-onan sa dakbayan.

Kini ang gipaabot ni konsehal John Michael Seno, chairman sa komite sa sports & youth development, sa tigom sa milabayng semana human gituki ang pagpatuman sa Oro Adolescent Health Program.

Sa tigom, gipresentar nila ni Community Improvement Division (CID) Officer-in-Charge Marissa Tagarda ug Oro Youth Development Officer (OYDO) James Patrick Santos ang mga proyekto paghaum sa pagpatuman sa maong programa.

Sa iyang bahin, si Population Commission (PopCom) Regional Director Aldrin Omega miingon nga usa kini sa labing importante nga programa nga mahatag sa tukmang impormasyon ngadto sa kabatan-onan aron malikayan o mapugngan ang teen-age pregnancy nga nagdala sa dakong risgo sa kababaehan.

Niini, si Seno uban sa pag-abag sa buhatan sa PopCom gipaabot nga mopahigayon og workshop alang sa hiniusang pagpanday sa gikinahanglang financial plan alang sa kalampusan sa programa.(SP/RNQuiblat)