Seno nangusog mapatuman na pagtukod og satellite offices sa CDRRMD, Oro Rescue 911

Kinahanglang dalion na ang paghikay sa proyekto pagtukod og satellite offices sa CDRRMD ug Oro Rescue 911. Paspas kaayo ang paglambo sa dakbayan sa Cagayan de Oro ug grabe na ang kahimtang sa dagan sa trapiko sa syudad.

Mao kini ang panawagan ni Konsehal John Michael Seno, atol sa milabayng tigom sa komite sa Climate Change Adaptation and Mitigation and Disaster Risk Reduction, human kulang sa gikinahanglang teknikalidad ang gipresentar nga structural plan alang sa proyekto nga gilaraw tukuron diha sa barangay Lumbia ug Agusan.

Gikahingawa ni Seno nga maparehas unya sa problema sa tubig nga naabtan sa dako nga paglambo ug wala nakaapas ang Cagayan de Oro Water District (COWD) sa paglambo resulta sa hinay kaayo ang ilang serbisyo. Angayang sa daling panahon mapahimutang na gayud ang maong mga satellite offices aron mapadali ang pagresponde sa mga emerhensya.

Malaumon si Seno nga mahan-ay na sa Technical Working Group (TWG) nga gipangunahan sa CDRRMD uban sa pakigtambayayong sa City Engineer’s Office ang plano ug programa sa proyekto aron makuha na ang panugot sa mayor ug mapangitaan sa tinubdan sa pundo.

Ang tigom gitambongan nila ni konsehal Aga Suan ug Bernie Esparcia.