Seno motuon sa 2023 SK Annual Budget sa Macasandig

GIHINGUSGAN sa Sangguniang Kabataan (SK) sa Barangay Macasandig nga mapatuman ang mga programa nga maghatag og dugang kaarangan sa kinabuhi sa kabatan-onan sa ilang dapit.

Kini human nadawat sa komite sa Sports and Youth Development ni Konsehal John Michael Seno ang resolosyon sa SK sa barangay diin nasukip ang ilang 2023 annual budget alang sa dugang pagtuon ug rekomendasyon.

Ang maong budget adunay gibanabanang kinitaan ug galastohan balor P6,574,585.00 ug gilantaw nga magpatuman sa mga gihan-ay nga programa ug proyekto sa kabatan-onan karong tuiga.

Tipik sa gihatagan og prioridad mao ang programa kabahin sa Active Citizenship o’ capability building nga mag-agni sa kabatan-onan nga makiglambigit sa mga gihikay nga mga kalihokan. Gipundohan usab sa SK ang pagpamalit og lima ka unit laptop nga magamit sa ilang buhatan, duha ka set sa basketball goal ug usa ka unit scoreboard. Dugang gigahinan mao ang pagtul-id sa ilang baskeball court aron magamit sa kabatan-onan sa ilang mga kalihokan.