Seno motuki sa lakang pagtukod og satellite offices sa CDRRMD, Oro Rescue 911

Padayong tukion sa komite sa Climate Change Adaptation and Mitigation and Disaster Risk Reduction ni Konsehal John Michael Seno ang lakang pagmugna og satellite offices sa CDRRMD ug Oro Rescue 911 diha sa barangay Lumbia ug Agusan.

Kini human gitakdang magtigom ang komite ugmang adlawa sa alas 9 sa buntag diha sa hawanan sa konseho aron paghisgot sa kalamboan sa maong lakang gikan sa Technical Working Group (TWG) nga gipangunahan sa buhatan sa CDRRMD.

Mahinumdoman nga sa miaging tigom gitahasan ang TWG magsumite sa plano ug tanang gikinahanglang rekomendasyon alang sa maong katuyoan.

Ang tigom gipaabot tambongan nila ni konsehal Romeo Calizo, Roger Abaday, Ian Mark Nacaya, James Judith II, Yan Lam Lim ug Bise Mayor Bebot Rodriguez.

Gidapit usab ni Seno nga motambong sa tigom aron magpaambit sa ilang panahom ug opinyon sila si City Administrator Atty. Roy Hilario Raagas, City Legal Officer Atty. Kenneth Tamala, Acting City Accountant Roxanne Mae Ravidas, City Budget Officer Atty. Percy Salazar, City Treasurer Jasmine Maagad, City Health Officer Dr. Rachel Dilla, CLENRO Manager Engr. Armen Cuenca ug uban pang mga hepe sa lain laing buhatan sa City Hall nga nalambigit sa maong lakang.