Seno motuki sa lakang pagmugna og satellite offices sa CDRRMD, Oro Rescue

Magtigom karong alas 2 sa hapon diha sa hawanan sa konseho ang komite sa Climate Change Adaptation and Mitigation and Disaster Risk Reduction ni Konsehal John Michael Seno.

Hisgutan sa tigom ang taho sa Technical Working Group (TWG) nga gipangulohan ni CDRRMD head Nick Jabagat kalabot sa nagpadayon nga pagtuon pagmugna og satellite offices sa CDRRMD ug Oro Rescue 911 diha sa barangay Lumbia ug Agusan. Gipaabot nga motambong sa maong tigom sila si Konsehal Malou Gaane, Ian Mark Nacaya, Edgar Cabanlas, Romeo Calizo, Roger Abaday, Yan Lam Lim, James Judith II ug Bise Mayor Jocelyn Rodriguez.

Gidapit pagtambong sa tigom aron paghatag sa ilang panahom ug opinyon sila si City Administrator Atty. Roy Hilario Raagas, City Legal Officer Atty. Kenneth Tamala, CPDO officer-in-charge Ramir Balquin, Cagayan de Oro City Lumbia Hospital officer-in-charge Dr. Liova de Guia ug uban pang mga dinapit.