Seno motuki sa giingong illegal nga mga straktura dihas Bugo nat’l highway

Konsiderahon sa komite sa public works sa tigom ugmang adlawa, Hunyo 2, 2023, nga dumalahon ni Konsehal John Michael Seno ang sulat sa Task Force Demolition kalabot sa mga illegal nga straktura nga nakabalda sa drainage project sa Department of Public Works and Highways (DPWH) diha sa national highway dapit sa barangay Bugo.

Sa maong sulat gipasabot nga ang buhatan sa Building Official (OBO) nagpadala na og pahibalo ngadto pipila ka hingtundang tag-iya nga gimandoan alang sa boluntaryong pagtangtang sa mga straktura nga nakababag sa proyekto.

Apan, matod pa, gibaliwala lang ug walay aksyon nga gihimo ang mga tag-iya gawas nga gisupak pa hinoon ang maong mga pahimangno.

Niini, gidapit sa komite nga motambong sa tigom ang mga hintungdang ahensya sa gobyerno aron hiniusang mahisgutan ang mga lakang nga angayang buhaton ngadto sa mga tag-iyang wala nagkooperar.