Seno misuporta sa Sports Academy sa Samahang Basketbol ng Pilipinas (SBP)

GISUPORTAHAN ni Konsehal John Michael Seno, chairman sa komite sa Sports and Youth Development, ang programang Basketball Sports Academy nga gipasiugdahan sa Samahang Basketbol ng Pilipinas (SBP) uban sa kolaborasyon sa kagamhanan sa dakbayan sa Cagayan de Oro.

Gipasabot ni Seno nga ikatulo na kini ka tuig nga gihimo sa SBP ug gikan pa sa Metro Manila ang mga trainers ug coaches sa panguna nila ni Coach Jong Uichico, Noli Ayo, Russell Raypon ug Sander Gubat.

Matod ni Seno nga ang SBP ang nag-advocate sa mga programa alang sa basketball ug usa sa ilang proyekto mao ang pagpalambo sa kahanas sa mga coaches.

Nasayran nga adunay 105 ka mga coaches gikan tibuok Mindanao ang nakapahimulos sa program.

Talagsaon kini nga oportunidad sa mga coaches aron ma-update ug matunol ang mga bag-ong pamaagi o teknik ug mapauswag ang kahanas sa ilang mga magdudula ilabina ang mga atleta sa mga nagkadaiyang tunghaan ug sa kabarangayan.

Niini, si Seno kusganong nagpasalamat sa SBP kay dinhi gihimo sa dakbayan sa Cagayan de Oro ang programa ug nakahatag kini og dakong garbo sa dakbayan nga nahimong venue sa maong kalihokan.