Seno misuporta sa basketball clinic program sa mayor

HUGOT nga gisuportahan ni Konsehal John Michael Seno, chairman sa komite sa Sports and Youth Development, ang programa ni Mayor Klarex Uy nga basketball sports clinic dinha sa matag barangay.

Sa miaging Klarex nga Serbisyo sa Baryo, nasayran nga kapin sa 50 ka kabataan sa barangay Tagpangi ang nakapahimulos sa basketball clinic ug nakadawat sa dugang kahibalo kalabot sa dulang basketball samtang mokabat usab sa 40 ka kabataan ang nakapahimulos gikan sa barangay Balubal.

Dako ang pasalamat ni Seno nga gihingusgan sa mayor ang maong programa kay makatabang kini nga dili permi anaa magtutok sa mga gadgets ang kabataan.

Nanghinaut si Seno nga matunol ang maong basketball sports clinic sa tanang barangay dala ang paglaum nga daghang kabataan ang maaghat sa pagsalmot sa kalihokan.