Seno misugyot mapalapdan Bantiles Creek

SI Konsehal John Michael Seno, Chairman sa Komite sa Public Works, misugyot nga mapalapdan ang Bantiles Creek diha sa Barangay Bugo.

Kini aron mahatagan sa solusyon ang reklamo sa mga molopyo sa dapit nga giingong dali rang mabahaan bisan sa hinay lang nga mga pag-ulan.

Sa tigom sa komite niadtong Mierkoles, si Konsehal Benie Esparcia kinsa maoy mitaho ngadto sa Konseho, mipasabot nga ang mulo sa katawhan sa dapit nadawat human nasinati ang grabeng pagbaha nga nagdala sa balas o’ lapok.

Niini, si Kapitan Vic Talingting sa Barangay Bugo mibutyag nga kaniadto anaa sa 15 metros ang kalaparon sa maong sapa apan sa kasamtangan nagkagamay kini tungod sa pagsulod sa pipila ka mga residente, butang nga nakapalisod sa pagsulod sa mini backhoe sa barangay aron maghinlo.

Subay niini, gihangyo ni Seno ang Department of Public Works and Highways (DPWH) nga mapundohan sa ilang 2024 Annual Budget ang pagpalapad sa Bantiles Creek aron masolusyonan ang problema.

Ang komite naglaraw usab pagpahigayon og ocular inspection sa dapit sa umaabot Septembre 29, 2023 aron makita ang aktwal nga sitwasyon sa dapit. (JRGalano/SP)