Seno misugyot mabutangan og taga-CDO board sa MORESCO-I

Daghan na kaayo gitukod nga mga subdivision busa nagdaghan na ang atong mga konsumante sa kuryente diha sa atong mga hinterland barangays ug dili malikayan nga adunay gayuy mga yangongo nga nagkinahanglan og pagtagad.

Mao kini ang unod sa special report ni Konsehal John Michael Seno, chairman sa komite sa Sports and Youth and Development, atol sa sesyon sa konseho niadtong Lunes nga gidumala ni Bise Mayor Bebot Rodriguez.

Si Seno misugyot nga unta mabutangan og board of director nga magrepresentar sa dakbayan sa Cagayan de Oro dinha sa MORESCO-1 Board.

Iyang gibutyag nga tungod kay kooperatiba man ang MORESCO-1 gikan sa Lungsod sa Lugait, Manticao, Naawan, Initao, Gitagum, Libertad, Laguindingan, Alubijid, El Salvador City ug Opol, Misamis Oriental adunay tagsa-tagsa ka Board of Director isip representante nga ang usa sa ilang tahas magpaabot sa mga mulo ug problema sa konsumante sa ilang dapit aron matagaan sa tukmang aksyon.

Dugtong sa konsehal nga sa iyang tan-aw mas daghan ang mga konsumante gikan Zone 10, 11, 12 sa Barangay Carmen paingon ngadto sa mga hinterland barangay sa Distrito 1 kun itandi sa nasangpit nga mga munisipyo nga kun adunay mga nagkadaiyang yangongo ilabina sa labing layo nga barangay sa Besigan moadto pa sa opisina sa MORESCO-1.

Ang taho ni Seno giduso ni Bise Mayor Bebot Rodriguez ngadto sa komite sa energy ni Konsehal Romeo Calizo alang sa dugang pagtoon ug rekomendasyon.