Seno misugyot alang sa paperless session

Gihingusgan ni Konsehal John Michael Seno, chairman sa komite sa Sports and Youth Development, nga sagopon sa konseho sa dakbayan ang paperless o’ electronic tran- sactions sa pagpahigayon sa session og committee meetings sa konseho sa syudad ug sa mga kabarangayan.

Kini ang iyang gipaabot atol sa sesyon sa konseho niadtong Lunes nga gidumala ni Bise Mayor Bebot Rodriguez.

Matod ni Seno nga iyang namatikdan nga nagtapok sa iyang buhatan ang mga hard copy sa agenda sa sesyon nga adunay 100 kapin ka mga panid.

Niini, kusganong gihangyo ni Seno nga unta sagopon ang unsay anaa sa moderno ug bag-ong teknolohiya pinaagi sa Documents Distribution System (DDS) sa pagpadala kanila sa kopya sa ilang mga agenda sugod sa umaabot Enero 2023.

Gawas nga makadaginot ang kagamhanan sa dakbayan sa galastohon sa pagpatik, makatabang usab dinha sa pagproteher ug pagpreserba sa kinaiyahan kay ang papel ginama man gikan sa kahoy ug maminusan na ang pagpamutol niini, dugang pasabot sa konsehal.

Nunot niini, ang konseho misagop og resolosyon nga nanawagan sa 80 ka barangay ug mga Sangguniang Kabataan nga paningkamotan nga mag-paperless usab dinha sa pagpaabot sa komunikasyon alang sa mga transaksyon sa kabaranggayan