Seno mirekomendar sa SK annual budget sa Brgy 31

Giuyonan na sa komite sa Sports and Youth Development ni Konsehal John Michael Seno ang gisumeteng Sangguniang Kabataan (SK) Annual Budget sa Barangay 31 ug giduso ngadto sa komite sa pamalaod ni Konsehal Ian Mark Nacaya aron masukip sa agenda sa umaabot sesyon sa konseho.

Ang maong budget adunay gibanabana kinitaan ug galastohon balor P819,733.00 nga gilantawng gamiton sa pagpatuman sa mga programa ug proyekto nga maghatag og dugang kalamboan sa kinabuhi sa kabatan-onan sa dapit.

Lakip sa gipundohan sa SK mao ang programa pagpakatap og impormasyon kabahin sa pagproteher sa kinaiyahan, paghatag og gahum ug kapanginabuhian sa kabatan-onan, gender sensitivity, kampanya kontra droga ug mga programa pahaom sa kasaulogan sa Linggo ng Kabataan ug uban pa nga gilantawng mag-aghat sa kabatan-onan nga makiglambigit sa mga kalihokan nga giandam alang kanila.

Alayon niini, si Konsehal Seno nanawagan sa tanang opisyal sa barangay sa dakbayan nga giyahan ang ilang mga opisyal sa SK sa mga responsibilidad ug gimbuhaton aron ma-andam sa umaabot nga mga henerasyon sa pagpanerbisyo sa ilang tagsa-tagsa ka barangay.