Seno midayeg sa gipakitang kolaborasyon sa DPWH, RTA

“Maayo naman ug medyo nahapsay na ang dagan sa trapiko diha sa Barangay Puerto tungod sa gihimong kolaborasyon sa buhatan sa Department of Public Works and Highways (DPWH) ug sa Roads and Traffic Administration (RTA).”

Kini ang gibutyag ni Konsehal John Michael Seno, chairman sa Komite sa Public Works atol sa sesyon niadtong Lunes nga gidumala ni Presiding Officer Pro Tempore Konsehal Romeo Calizo agig reaksyon sa taho ni Konsehal Christian Ian Rustico Achas kabahin sa pag gaan sa trapiko diha sa Barangay Puerto Highway.

Matod sa Konsehal nga iyang gikalipay ang gihimong kolaborasyon ug ang pagtambayayong sa RTA og DPWH human sa panghitabo sa milabayng semana nga sobra ang kahoot sa dagan sa trapiko ug iyang gitataw nga dili angayan nga magtinudloay kon kinsa ang sayop.

Niini si Konsehal Seno malaumon nga unta mapadayun ang nasugdang kolaborasyon sa DPWH ug RTA aron nga maminusan ang paghoot sa dalan bisan og walay proyekto nga gipatuman.