Seno miawhag natibawas road project duol sa USTP

HUGOT nga gihangyo ni Konsehal John Michael Seno, chairman sa komite sa public works, ang rehiyonal nga buhatan Department of Public Works and Highways (DPWH-10) nga mapadali ang pagtibawas sa gipatumang proyekto dinha sa dalan CM Recto Avenue duol sa University of Science and Technology of Southern Philippines (USTP).

Kini ang gipaabot sa konsehal atol sa milabayng tigom sa iyang komite human gituki ang sugyot ordinansa nga nanawagan sa daling pagkompleto sa gitrabahong mga dalan sa syudad.

Gibutyag ni Seno ang iyang namatikdan nga taod taod na ang pagtrabaho sa proyekto apan wala pa mahuman hangtod sa kasamtangan.

Matod niya nga kun makaya sa kontractor pagtrabaho sa 24/7 unta ilang buhaton aron mapadali ang pagtrabaho ilabina nga gisirado ang portion sa gitrabahong dalan.

Gidugang sa konsehal nga masabot niya nga adunay mga higayon nga dili pwede ang 24/7 nga pagtrabaho ilabina kun saba ug makadisturbo sa katawhan apan kanang diha sa USTP wala may madisturbo kun trabahoon sa gabii kay dili man residential ang area.

Niini, ang representante sa DPWH namahayag nga hapit na mahuman ang proyekto dala ang pasalig nga mandoan ang kontractor nga paspasan ang pagtrabaho sa proyekto. (SP/JRGalano)