Seno miawhag maprioridad transport sector

Si Konsehal John Michael Seno, chairman sa komite sa sports and youth development, hugot nga mihangyo nga mahatagan gayud sa pagtagad ang sektor sa transportasyon sa syudad.

Kini ang iyang gipadayag atol sa sesyon sa konseho niadtong Lunes nga gidumala ni Bise Mayor Bebot Rodriguez agig reaksyon sa taho ni Konsehal Imee Moreno kabahin sa modernisasyon sa transportasyon sa dakbayan.

Atol sa iyang gitambongan nga launching sa LFTRB isip representante ni Mayor Klarex Uy, nasayran nga adunay aprobadong 100 ka ruta nga abri alang dinhi sa syudad kay kini ang solosyon sa pag-decongest sa mga lugar nga dili gakaagian ug mabahin ang sektor sa transportasyon nga asa sila moagi ilabina sa mga bag-ong dalan nga dili gakaagian.

Gihatagan lamang og duha ka option sa pag-apply og ruta ug wala nay indibidwal kun dili pinaagi na sa korporasyon o’ kooperatiba.

Sa pakisusi ni Seno, dako ang kabalaka sa sektor sa transportasyon nga mawad-an og panginabuhian dala sa maong implementasyon sa modernisasyon sa transportasyon sa syudad.

Niini, siya misugyot nga anaa sa buhatan sa Community Improvement Division ug komite sa kooperatiba sa konseho nga matabangan sa mga gikinahanglang resikitos ilabina sa wala pa nahimong korporasyon aron sa pagrehistro ngadto sa Cooperative Development Authority ug makakuha sa personalidad nga makautang diha sa LandBank (LBP) o Development Bank of the Philippines (DBP).

Nasayran usab sa konsehal nga niining panahona ang LBP adunay P10 bilyones nga gigahin nga pundo alang sa maong katuyoan. Niini, naglaum si Seno nga unta matabangan kining sektor sa transportasyon sa kahigayonan aron magpabilin ang ilang kapanginabuhian.