Seno dismayado sa wala paglukat sa COWD og road closure permit

DAKO ang kadismaya ni Konsehal John Michael Seno sa gihimong pagkalot sa Cagayan de Oro Water District (COWD) diha sa dalan sa Kauswagan atbang sa National Telecommunications Commission (NTC) nga giingong walay road closure permit gikan sa Roads and Traffic Administration (RTA).

Sa milabayng tigom sa iyang komite sa public works, ang RTA mitaho sa maong pagkalot sa Water District nga walay panugot hinungdan nga ilang gipahunong ang kalihokan tungod kay delikado kini sa mga motorist ug sa katawhan ilabina panahon sa kagabhion.

Niini, si Seno miawhag sa Water District nga respetohan ang ordinansa sa dakbayan tungod kay parehas mang ahensya sa gobyerno ug dili maayong paminawon nga ang kagamhanan sa syudad mao ang nahimong saypan sa ilang kalapasan. Walay bulan nga walay reklamo batok sa Water District nga wala nagtuman sa ordinansa syudad, pamahayg ni Seno.

Subay niini, gihangyo ni Seno ang City Legal Office sa pagpatuman sa balaod aron mosunod ang Water District ug dili na mausab ang maong kalapasan.