Seguridad sa mga establisamento angay’ng hugtan - Goking

Si Konsehal George Goking, chairman sa Komite sa Trade and Commerce, mipahinumdum sa mga negosyante dinhi sa dakbayan nga hugtan ang seguridad sa ilang mga establisamento sa tanang panahon.

Kini ilabina nga nagsingabot nga kapistahan sa syudad sa umaabot Agosto 28, 2023. Ang panawagan sa konsehal gihimo human sa nahitabong pagpanulis sa usa ka pawnshop sa miaging semana diha sa Cogon area. Matod ni Goking nga ang mga negosyante gibati og kahingawa sa kasamtangang kahimtang sa kahusay ug kalinaw sa syudad.

Iyang gipasabot nga gikinahanglang hugtan gayud ang pagbantay sa mga personahe sa matag establisamento ilabina sa mga gwardya ug kinahanglan ang pagtamod sa ordinansa nga nagmando sa pag-instalar og CCTV camera aron mabantayan ang pagsulod ug paggawas sa mga kliyente.

Mahinumdoman nga sa milabayng tuig, ang pundok sa mga negosyante mipahigayon og security briefing aron mamintinar ang kahusay sa tanang bahin sa syudad.

“Kinahanglan nga mapatigbabaw ang kalinaw ug mahatag ang saktong kapaseguroan ngadto sa mga negosyante ug konsumedor aron makuha ang padayong pagsalig sa katawhan,” pamahayag ni Konsehal George Goking.