Search for most healthy barangay tun-an sa komite sa health

GIHINGUSGAN ni Bise Mayor Bebot Rodriguez nga madasig ang mga barangay sa pagpalambo sa sistema, pagdumala ug pagsagop sa labing maayo nga serbisyo ug programa sa panglawas ngadto sa ilang mga residente subay sa nasudnon ug lokal nga sumbanan.

Kini human giduso ni Bise Mayor ang sugyot ordinansa gikan sa City Health Board ngadto sa komite sa panglawas ubos ni Konsehal Malou Gaane alang sa dugang pagtuon.

Ang maong ordinansa gitawag og “Search for the most healthy barangay: Himsog nga Kagay-anon para sa syudad nga lig-on.”

Ang maong sugyot ordinansa nagtumong sa paghatag sa de kalidad nga serbisyo sa panglawas ug sa paghatag ug mga ganti, pag-ila alang niadtong nagpakita sa talagsaong pagdumala ug paghatag og serbisyo sa panglawas.

Ang search magsugod sa buwan sa Agosto kada tuig nga adunay duha ka kategoriya nga  naglangkob sa named barangays ug numbered barangays; ug duha ka kriterya nga naglakip sa governance, 30% ug service delivery, 70%.

Sa bulan sa Enero himoon ang presentasyon sa mga mananaog.

Niini naglaum ang bise mayor nga daghang barangay nga mag-apil sa maong search kay nagdala kini sa dakong dungog sa ilang barangay.