School bldgs sa 2 brgys padayong gitukod

GILANTAW nga mahatagan sa komportableng tunghaan nga hitsas sa pasilidad ang kabataan sa Barangay Canitoan ug Iponan.

Kini human ang rehiyonal nga buhatan sa Department of Public Works and Highways misumete sa kasamtangang kahimtang sa mga proyektong padayong gipatuman dinhi sa dakbayan.

Lakip sa padayong gitrabaho mao ang tulo ka andanang edipisyo nga adunay unom ka lawak saringan alang sa Canitoan Elementary School ug upat ka andanang edipisyo nga adunay walo ka lawak saringan alang sa Iponan National High School.

Gipasabot ni Konsehal Suzette Magtajas-Daba, Chairman sa Edukasyon,  nga ang maong edipisyo dako og ikatabang sa kabataan aron makabaton sa de kalidad nga edukasyon dili lamang diha sa duha ka barangay kun dili lakip na sa kasikbit nga mga dapit.

Malaumon si Daba nga matibawas na unta sa labing daling panahon ang maong mga proyekto aron matubag ang kakulangon sa mga lawak saringan dinha sa mga tunghaan.