Scholarship program sa CDO wala gigamit sa politika, Suzette

GITIN-AW ni Konsehal Suzette Magtajas-Daba, chairman sa komite sa Edukasyon, nga wala sukad nagtangtang og iskolar sa dakbayan tungod sa politikanhong koneksyon (political affiliation).

Kini ang gipasabot sa konsehal agig reaksyon sa special report ni Konsehal Lordan Suan atol sa sesyon sa Lunes nga gidumala ni Bise Mayor Kikang Uy kalabot sa pagpanghadlok sa mga iskolar nga matangtang sa programa kun dili mosuporta sa mga kandidato sa administrasyon.

Matod ni Konsehal Suzette nga sa administrasyon ni Mayor Oscar Moreno gipalapdan pag-ayo ang City College Scholarship Program sa tinguha nga walay mapihig pagkuha sa tukmang edukasyon alang sa maayong kaugmaon.

Matod niya nga sa unang tuig ni Mayor Oscar Moreno sa tuig 2013 aduna lamang 700 ka iskolar ang syudad ug karong tuiga mokabat na sa 7 mil ang mga iskolar taliwala sa nasinating pandemya.

Ang mga kwalipikadong tinun-an sa programa miagi og makuting pagsusi sa screening committee nga gilangkoban sa Scholarship Board, representante gikan sa academe, CHED, DepED, lain-laing stakeholders, inter-faith ug uban pang ahensya sa gobyerno, dugang pagpasabot ni Konsehal Suzette.

Matod niya nga nadawat ang usa ka tinun-an isip iskolar sa dakbayan tungod kay kwalipikado ug nakapasar sa mga rekisitos ug dili tungod sa bulok sa politika.

Walay usa ka barangay opisyal o opisyal sa syudad nga maghatag og rekomendasyon nga mamahimong iskolar ug makapatangtang sa usa ka iskolar sa dakbayan, panapos ni Konsehal Suzette Magtajas-Daba.