SB1 sa Brgy 35 SK giaprobahan na

DUGANG kalamboan sa sektor sa kabatan-onan ang gipaabot nga mapatuman sa mga opisyal sa Sangguniang Kabataan sa Barangay 35.

Kini human ang konseho sa syudad sa sesyon kagahapon nga gidumala ni Bise Mayor Bebot Rodriguez, misagop sa resolosyon nga nag-uli sa resolosyon sa Sangguniang Kabataan sa Barangay 35 diin nasukip ang Supplemental Budget No. 1 (SB1). Kini naglangkob sa gibanabanang kinitaan ug galastohon balor P89,693.48.

Tipik sa gihatagan og prayoridad ang programa sa edukasyon ilabina ang paghatag og dugang kahibalo sa kabatan-onan kalabot sa panglawas ug uban pang proyekto nga makapadasig diha sa pagkab-ot sa dugang kaarangan sa kinabuhi sa kabatan-onan.

Si Konsehal John Michael Seno, chairman sa Komite sa Sports and Youth Development ug usa sa nagpaluyo sa gisagop nga resolusyon, mipadayag sa iyang suporta sa maong lakang human nakita nga nahisubay kini sa balaod ug dako ang ikatabang alang sa kaarangan ug kalamboan sa kabatan-onan.

Ang resolusyon nga gipalabang sa konseho alang sa maong katuyoan gipaluyohan usab sa Komite sa Pamalaod ni Konsehal Edgar Cabanlas.