SB1 sa Brgy 31 SK giuyonan

Hayan mahatagan og dugang kalamboan ang mga kabatan-onan diha sa Barangay 31.Kini human ang konseho sa syudad sa sesyon niadtong Lunes nga gidumala ni Bise Mayor Bebot Rodriguez, misagop sa resolusyon nga nag-uli sa resolosyon sa Sangguniang Kabataan (SK) sa barangay diin nasukip ang ilang Supplemental Budget No. 1 (SB1) karong tuig 2023 alang sa hingpit nga pagpatuman.

Ang maong budget adunay gibanabanang kinitaan ug galastohon balor P742,838.00. Gihatagan og prayoridad sa barangay nga mapatuman mao ang mga programa sa paugnat sa kusog ug kalihokan pahaom sa kasaulogan sa Linggo ng Kabataan.

Gipundohan usab ang pagpatuman sa programa pagproteher sa kinaiyahan, pagpakatap sa dugang kahibalo kabahin sa saktong pag-atiman sa panglawas, youth empowerment and livelihood, capability building, kampanya kontra droga ug uban pang proyekto makaaghat sa kabatan-onan makiglambigit sa mga kalihokan.

Ang resolusyon nga gisagop sa konseho alang sa maong katuyuan gipaluyohan sa Komite sa Sports and Youth Development ni Konsehal John Michael Seno ug Komite sa Pamalaod ni Konsehal Edgar Cabanlas.