SB1 sa 3 brgys giaprobahan sa konseho

Dugang tulo ka mga barangay ning syudad ang makapatuman na sa ilang dugang proyekto nga gipunduhan sa milabayng tuig 2022.

Kini human ang konseho sa syudad sa sesyon niadtong Lunes nga gidumala ni Bise Mayor Jocelyn Rodriguez mipasaka og tulo ka managlahing resolusyon nga nag-uli sa ordinansa sa Barangay 36, Agusan ug Bugo diin nasukip ang ilang Supplemental Budget No.1 (SB1).

Niini, ang SB1 sa Barangay 36 adunay gibanabanang kinitaan ug galastohon balor P326,266.00; P2.71 milyones kapin usab sa Barangay Agusan samtang ang Barangay Bugo adunay P6.14 milyones kapin.

Lakip sa gigahinan sa maong mga barangay ang 20 porsyentong Development Fund, maintenance and operating expenses sa barangay ug uban pang mga programa ug proyekto nga gilantawng magpalapad sa ilang serbisyo sa ilang tagsa tagsa ka barangay.

Ang resolusyon nga gipasaka sa konseho alang sa maong katuyuan gipaluyuhan sa komite sa barangay affairs ni Konsehal Yan Lam Lim ug komite sa pamalaod ni Konsehal Ian Mark Nacaya.