SB 1 sa Brgy 25 aprobado sa Konseho

Mahimo nang ipatuman sa Barangay No. 25 ang ilang dugang mga programa sa nahabiling bulan sa tuig 2023. Kini human ang Konseho sa syudad sa sesyon niadtong Lunes nga gidumala ni Bise Mayor Bebot Rodriguez, misagop sa resolusyon nga nag-uli sa ordinansa sa barangay diin nasukip ang ilang Supplemental Budget No. 1 nga mobalor og P567, 761.00.

Tipik sa gipunduhan sa barangay sa maong budget ang pagmintinar ug operasyon sa Senior Citizen Center, Cultural Athletics, Barangay Tanod Capability Enhancement,ug uban pang operating expenses sa barangay nga magpalambo sa ilang batakang serbisyo nga itunol ngadto sa katawhan. Gigahinan usab sa barangay og igong pundo ang pagpanghinlo sa mga kanal sa tinguha nga masolosyonan ang pagbaha.

Ang resolusyon nga gipalabang sa Konseho alang sa maong katuyuan gipaluyuhan sa Komite sa barangay affairs ni Konsehal Yan Lam Lim, ug Komite sa Pamalaod ni Konsehal Edgar Cabanlas.