Satellite offices sa CDRRMD diha sa Lumbia, gisuportahan ni Kon. Esparcia

KINAHANGLAN gayud nga ang syudad magbutang og satellite offices sa CDRRMD ug Oro Rescue 911 diha sa barangay Lumbia ug Agusan.

Kini ang gibutyag ni Konsehal Bernie Esparcia atol sa milabayng tigom sa komite sa climate change adaptation and mitigation and disaster risk reduction nga gidumala ni Konsehal John Michael Seno.

Matod ni Esparcia nga dako ang iyang suporta sa mga rekomendasyon alang sa pagpatuman sa maong proyekto human gipresentar sa Technical Working Group (TWG) sa panguna sa buhatan sa CDRRMD ubos ni Nick Jabagat ang structural plan alang sa duha ka andanang satellite offices.

Giingon nga kini ang solosyon sa gakasinating pagkalangan sa pagresponde sa mga tawag emerhensya diha sa kadalanan dala sa sobrang kapiot nga dagan sa trapiko.

Niini, si Esparcia hugot nga misuporta sa sugyot ordinansa dala ang panghinaot nga mapalabang kini sa daling panahon kay dako kini nga tabang diha sa katawhan sa dakbayan.