Satellite office sa CHUDD dihas Pahiron gisugyot

ARON mabantayan ug mapadali ang pagmatikod ug pagkoordinar tali sa mga kontraktor, gisugyot ni Konsehal Edgar Cabanlas, Chairman sa Komite sa Urban and Rural Poor and Housing Development, nga mabutangan og satellite office sa City Housing and Urban Development Department ang 722 Housing Project sa Sitio Pahiron, Barangay Lumbia.

Kini aron malikayan nga subling kawaton ang mga toilet bowl, jalousies, electrical wirings ug uban pang kahimanan nga anaa sulod sa mga housing units nga nahuman na og trabaho apan wala pa matunol ngadto sa mga benepisaryo.

Sumala ni Cabanlas nga dili lang sa Sitio Pahiron ang butangan sa temporaryong opisina sa CHUDD ug kun mahimo ang tanang relocation sites sa syudad aron masiguro nga luwas sa pagpangawat ug dili makasulod ang mga dili benepisaryo sa programa.

Niini, iyang gitahasan ang mga kawani sa CHUDD nga sutaon ug hatagan sa unang pagtagad ang pagpangita sa listahan sa benepisaryo sa 722 Housing Project aron matunol na ang bakanteng 120 ka gambalay nga nakompleto na sa pagtrabaho.

Malaumon si Cabanlas nga ang pagbutang sa mga satellite offices sa CHUDD dinha sa mga relocation sites sa syudad makatabang nga masolusyonan ang nasinating problema.