Salcedo naninguha mapadali ang pagtukod sa mga cellsite towers

GIHINGUSGAN ni Konsehal Enrico Salcedo, chairman sa komite sa environment and natural resources sa konseho, nga mapadali ang aplikasyon sa mga telecommunication companies diha sa ilang pagtukod og mga tower.

Kini aron matubag ug masolusyonan na ang dugay nang problema sa katawhan kalabot sa labihan ka hinay sa signal sa internet connection.

Sa tigom sa komite sa miaging semana, usa sa mga telco player ang mipadayag sa ilang kahingawa tungod adunay pipila ka aplikasyon nga nalangan.

Gipasabot sa representante sa Office of the Building Official (OBO) nga ang pagkalangan tungod kini sa mga kakulangon sa mga rekisitos nga angayan nilang kompleton, hinoon gipasalig nga andam ang ilang buhatan nga asikasohon ug giyahan aron nga mapadali ang pagproseso.

Si Konsehal Salcedo mibutyag nga mahinungdanon kaayo ang internet ilabina karong panahon sa pandemya nga diin gigamit kini sa tanan labina sa mga estudyante diha sa ilang mga online classes ug niini mihangyo ngadto sa OBO nga abagan ug giyahan lang ang mga telco players aron madali ang ilang mga aplikasyon.