Salcedo nangusog taga CDO ra makalabay og basura sa Sanitary Landfill

WALA na gayoy laing munisipalidad ang tugotan nga molabay sa ilang basura sa atong Sanitary Landfill.

Kini ang gibutyag ni Konsehal Eric Salcedo, Chairman sa Komite sa Environment and Natural Resources sa sesyon sa konseho niadtong Lunes nga gidumala ni Bise Mayor Kikang Uy human niini nasayran gikan kang konsehal John Michael Seno nga adunay pipila ka munisipalidad nga galabay og basura sa Sanitary Landfill.

Matod sa konsehal nga iya kini gisukip sa padayong gipanday nga proposed Environmental Code nga dili na gayud tugotan ang laing lugar paglabay sa ilang basura.

Gipasabot ni Salcedo nga angayan lang nga walay laing munisipalidad nga tugotan sa paglabay sa landfill tungod kay kon mapuno kini ang dakbayan ra gihapon ang magbago ug magproblema sa pagsulbad niini.

“Hulat hulat lang kay wala matulog ang komite ug gipaningkamotan nga mapasa kini karong bulana”, pamahayag ni Konsehal Salcedo.